Bizkargi musika eta dantza eskolako kideak, Txalkor txistulari taldekoekin batera, kalera aterako dira etzi, igandea. Dantzarien Udaberri Kalejira egingo dute goiz-eguerdi partean, eta hitzordu hori aitzakia hartuta, herriko kaleak hartuko dituzte dozenaka dantzarik, trikitilarik eta txistularik.
Parte hartzaile guztiak 11:30ean elkartuko dira Julio Urkixo etorbidean; izan ere, kale horretatik hasiko dute kalejira Balda plazara. Hain justu, Balda plazan eskainiko dute aurreneko dantza saioa, 12:00etan hasita. Ordu erdi eskaseko emanaldia eskainiko dute han, eta 12:30ean, herriko plazara abiatuko dira kalejiran. Udaletxe aurrean eguneko dantza erakustaldi nagusia eskainiko dute haurrek. Eguneko bigarren saioaren ondoren, eliz atarira joko dute parte hartzaileek, han amaituko dute-eta kalejira 13:30ean.
Hona hemen etziko kalejiraren egitaraua:
- 11:30. Dantzarien eta musikarien bilkura, Julio Urkixo etorbidean.
- 11:45. Balda plazara bidea.
- 12:00. Dantza saioa, Balda plazan.
- 12:30. Herriko plazara bidea.
- 13:00. Dantza erakustaldia, herriko plazan.
- 13:30. Dantza saioa, eliza atarian.