Profesionalen esku pilotako Buruz Buruko Txapelketa Nagusiaren eta B Seriekoaren final laurdenetako ligaxken estreinako partidak bart gauean jokatu dituzte Azkoitiko Gurea pilotalekuan.
Lehen zati parekatua, tanto gogorrak, eta azkenera garaileen aldera lerrokatu diren bi partida ikusi ahal dituzte Gurean elkartutakoek. Buruz Buruko Txapelketa Nagusian, Iker Larrazabalek 22-17 garaitu du Iñaki Artola; eta B Seriean, Iñaki Rekalderentzat izan da garaipena, Unai Alberdi Alberdi II.a azpeitiarra 22-15 mendean hartuta.
Jaialdia borobildu duen binakako partidan, berriz, Zubizarreta IV.ak eta Ugartemendiak 22-18 irabazi diete Apezetxea II.ari eta Erostarberi.