Gertu da iaz Azpeitiko herrigunean eta Urrestillan grabatutako eta Amancay Gaztañagak eta Xanti Rodriguezek zuzendutako Piztiak telesailaren estreinaldia: apirilaren 23an estreinatuko da EITBren Primeran plataforman. Iñigo Aranbarri azkoitiarra eta Iraia Elias dira protagonistak. Azpeitiko Ospel Films ekoiztetxeak ekoitzitako telesaila da, EITBren sortzaile berrien deialdiko diru laguntzari esker.
Piztiak telesailean errealismo magikoa, ironia, komedia beltza eta krudeltasuna aurkituko ditu ikusleak. Istorioa baserri batean kokatzen da, eta fikzioa eta garai bateko istorioak uztartuko dituzte.