Azkoitia-Azpeitia maratoi erdia dela eta, trafikoan aldaketak eta errepideetan mozketak izango dira zapatuan, martxoaren 21ean, 15:30etik 17:30era bitartean. Azkoitiko herrigunean Julio Urkixo kalea, Kale Nagusia nahiz Ibaiondo kalea itxiko dituzte, eta trafikoa Auzmendi kaletik bideratuko dute, bi norantzatan.
Herrira sartzeko, berriz, Txerloiko biribilgunetik Ugarteigarango igerilekuetara joan beharko dute ibilgailuek, eta handik, Auzmendi kalera. Azpeitira joateko ere bide berbera erabili beharko da, gainera. Bestalde, Azkoitia eta Zumarraga arteko GI-631 errepidea zabalik izango da une oro.
15:30etik 17:30era, bi orduz, garraio publikoa ere ez da Azkoitiko herrigunera sartuko. Hain zuzen ere, autobusek Txerloiko biribilgunean eta Altzibar etorbidean egingo dituzte geldialdiak.