Taldez-talde egitasmoaren 25. urteurrena ospatuko dute igandean, Baztartxo antzokian. Kontzejupea martxoko hiru igandetan musika, dantza eta abestiekin jantzi ohi duen egitasmoa Baztartxon egingo dute aurten, eta gainera, emanaldi bakar batean. Urteurren borobila modu horretan ospatzea erabaki dute aurten antolatzaileek. Hori hala, 12:30ean hasiko da Bizkargi musika eskolako ikasleek, Iraurgi abesbatzak eta Azkoitiko Musika Bandak eskainiko duten emanaldia.
Antolatzaileek "elkarlanean" prestatu dute emanaldia, eta "berezia" izango da. "Kontzertua elkarrekin egindako lanaren eta urte hauetan guztietan sortutako musikaren ospakizuna izango da", azaldu dute haiek. Guztira, zortzi abesti eskainiko dituzte, eta dagoeneko ezagutarazi dituzte zein izango diren horiek: Loretxoa, Mendian gora haritza, Itsasoa gara, Erre zenituzten, Toyland Suite, Lantzeko zortzikoa, Afrika eta Ilargi berriak.
Emanaldia irekia eta doakoa izango da, eta hori hala, herritar orok gozatu ahal izango du kontzertuaz.