Xabier Ariznabarreta andoaindarrak irabazi du 44. Bizenta Mogel ipuin lehiaketa. Azkoitiko Udalak gaur, osteguna, jakinarazi du lehiaketaren aurtengo sarituen zerrenda, eta Ariznabarretak idatzitako Hosto lanak jasoko du lehen saria. Gotzon Plaza bilbotarrak jasoko du bigarren saria Kaiolan aske lanagatik, eta Iraitz Legarra markinarrak hirugarrena, Saint Louis-Somone ipuinagatik.
Aurten, guztira, 34 ipuin aurkeztu dira ipuin lehiaketara, eta, azken aldietan bezala, Iñigo Antsorregi, Yolanda Larrañaga eta Juan Luis Zabala aritu dira epaimahaikide lanetan. Udalak, ohi bezala, hiru lan sarituko ditu erakundeak; 1.600 euro banatuko ditu horien artean: 700 euro eta oroigarria jasoko ditu Ariznabarretak; 500 euro eta oroigarria Plazak; eta azkenik, 400 euro eta oroigarria Legarrak.
Sari banaketa ekitaldia hurrengo ostiralean, hilak 27, egingo dute udaletxeko bilkura areto nagusian, 19:00etan hasita. Udalak gogorarazi du ekitaldia irekia dela eta herritarrak denak daudela ekitaldira gonbidatuta.