Azkoitiko Udaleko Euskara Indarberritzeko eta Euskaldunak Ahalduntzeko Planaren parte hartze prozesuaren barruan, hura osatzeko bigarren eta azken bilera egin zuten atzo Elkargunean, erakundeak zein Euskara Mahaiak sustatuta. Datozen urteetako bide orria zehazteko beren alea jartzeko, hain zuzen, hainbat eragilek zein norbanakok parte hartu zuten atzoko saioan.
Eusko Jaurlaritzak 2024an onartu zuen Aroa. Euskara indarberritzeko eta euskaldunok ahalduntzeko marko estrategikoa, eta horrenbestez, udaleko Euskara sailek marko horretara egokitu beharko dute datozen urteetan, euskararen normalizazioan hark ezarritako irizpideak jarraitu behar dituelako. Hori hala izanda, osatzen ari diren planak orain arte indarrean zegoen Euskara Sustatzeko Ekintza Plana (ESEP) ordezkatuko du.
