Fitur nazioarteko turismo azoka egingo dute datorren astean Madrilen, eta urtarrilaren 22an, ostegunez, Ignaziotar Bidearen berrikuntzak aurkeztuko dituzte han jendaurrean. Hain zuzen ere, Ignaziotar Bidea: Bide bakarra, 10 helmuga leloa aurkeztuko dute azokan. Horrez gain, Ignaziotar Bidearen informazio eta baliabide guztiak biltzen dituen webgune berria ezagutzera emango dute, eta lehen helmuga turistikoak ere aurkeztuko dituzte: hamar bisita eta esperientzia proposamen, hain zuzen ere. Ignaziotar Bideko Udalerrien Elkarteak bultzatutako proiektua da hori, eta Azkoitiko nahiz Azpeitiko udalak elkarteko kide dira.
Ignaziotar Bideko Udalerrien Elkarteak Fiturrek eskaintzen duen erakusleiho handia aprobetxatu nahi du Ignaziotar Bidea nazioarteko turismo eragileei ezagutarazteko eta harreman instituzional estrategikoak lantzeko. Horretarako, Turespañako erakusmahaian izango du presentzia elkarteak.
Ignaziotar Bideko Udalerrien Elkartea iazko urtarrilean sortu zuten, Montserrateko monasterioan (Katalunia) ekitaldia eginda. Ignaziotar Bidea igarotzen den lurraldeetako erakargarritasun turistikoei balioa ematen dien proiektu berri baten hasiera izan zen ekitaldia. 650 kilometroko ibilbidea da Ignaziotar Bidea, Loiola eta Manresa (Katalunia) lotzen dituena eta 1522an Loiolako Ignaziok egin zuen bideari jarraitzen diona. Proiektuaren asmoa da barneko, kalitatezko eta urtaroek baldintzatu gabeko turismoa sustatzea, lurralde desberdinen batasuna eta konplizitatea oinarri hartuta.
Udaletako ordezkariak Fiturren
Elkartea osatzen duten 73 udalerrien artean, dagoeneko 40 herrik eta hirik baino gehiagok baieztatu dute Fitur azokan izango direla; besteak beste, bertan izango dira Azkoitiko, Azpeitiko, Legazpiko (Gipuzkoa), Zumarragako (Gipuzkoa), Urretxuko (Gipuzkoa), Guardiako (Araba) edota Kanpezuko (Araba) ordezkariak. Fiturren egingo den batzarrean, Ignaziotar Bidea sustatzeko jarduerak aurreikusten dituen 2029ra arteko ekintza plana azalduko dute.