Beidazar kaletik San Martin auzora sartzeko errepidea zabaldu dutela jakinarazi du udalak. Azken asteetan, obrak tarteko direla, itxita izan da San Martin auzorako sarbide hori, baina ireki dute dagoeneko. Gainerakoan, momentuz behintzat, beste aldaketarik ez du jakinarazi udalak; esan du ibilgailuen zirkulazioa dagoen bezala mantenduko dutela.
San Martin auzoaren goialdean Izar Jai urbanizazioa eraikitzen ari da Grupo Eibar enpresa sustatzailea, eta Azkoitiko Udalarekin sinatu zuten Hiritartze Proiektuaren barruan, auzoan hainbat urbanizazio lan egiteko konpromisoa hartu zuen enpresak. Auzoko hainbat kaletan eta hainbat eratako lanak gauzatuko ditu enpresa horrek, eta urbanizazioa eraikitzerako bukatu beharko ditu auzoko urbanizazio lanak ere. Udalak datorren urteko Aste Santurako aurreikusten du obren amaiera.