Xabier Munibe ikastolako LH 5. mailako ikasle talde batek irabazi du Durangoko Azokak antolatutako PortaDA! erronka. Euskarazko liburuak eta diskoak ezagutzeko nahiz ikasleen sorkuntza sustatzeko helburua duen lehiaketa da Durangoko Azokak antolatzen duena, eta Azkoitiko ikastola horretako ikasleek musika eskoletan egindako lana saritu dute Lehen Hezkuntzakoen kategorian.
Edozein garaitako liburuen eta diskoen portadak aurkeztu ahal izan dituzte ikaslee erronkara, eta Xabier Munibekoek Xabi ta Petti bikotearen diskoaren azala aurkeztu dute. Disko horren azalak trenbide bat erakusten du, eta Azkoitiko ikasleek hainbat hitz garraiatzen dituen egurrezko tren bat jarri dute trenbidearen aurrean. Euskal Herriko dozenaka ikastetxek parte hartu dute egitasmoan; guztira, 430 lan aurkeztu dira lehiaketara eta bi saritu dituzte. DBH-Batxilergoa kategorian Bilboko Urretxindorra ikastolak jaso du saria.
