Gipuzkoako Kros Txapelketa jokatu zen atzo, igandea, Ordiziko Oiangun. Txindoki Krosaren barruan jokatu zen txapelketa, eta Azkoitia-Azpeitia Xeye atletismo taldeko atletek emaitza bikainak lortu zituzten. Bingen Aranbarrik absolutuen mailan bigarren egin zuen, Julen Teran irabazlearen atzetik helmugaratuta. Azkoitiarrak, baina, 23 urtez azpikoen txapela irabazi zuen. Ane Bosch azkoitiarra ere txapela eskuratuta itzuli zen etxera, 16 urtez azpiko master emakumeetan garaipena lortuta.
Xeyeko taldea –Ane Bosch, Ane Arregi eta Laia Urrestilla– Gipuzkoako Kros Txapelketako 16 urtez azpiko emakumeen hirugarren postuan. (Goierri.hitza.eus)
Taldeka ere Gipuzkoako Kros Txapelketan emaitza onak izan zituzten atzo. 16 urtez azpiko gizonetan lehen postua eskuratu zuen Julen Zialtzetak, Jakes Zubizarretak eta Oier Arrizabalagak osatutako taldeak. 16 urtez azpiko emakumeetan, berriz, hirugarren gelditu zen Ane Boschek, Ane Arregik eta Laia Urrestillak osatutako taldea. Bigarren egin zuen Xeyeko taldeak infantil emakumeetan; talde hori Alaia Zubizarretak, Maite Arregik, Elene Albarez de Arkaiak eta Mirai Oleak osatu zuten.
Xeyeko infantil emakumeen taldea Gipuzkoako Kros Txapelketako bigarren postuan. (Goierri.hitza.eus)