Ainhoa Arrietak jaso du Zubiaurre igeriketa klubaren 2025. urteko San Andres eguneko sari handia. 75.874 zenbakia suertatu zen azaroaren 30eko ONCEko zenbaki irabazlea, eta hura Arrietak zuen. Irabazleak 2.500 euroko erosketa bonua jasoko du Azkoitiko Herrixen merkatari elkartearen barruko saltokietan erabiltzeko. Arritxu Larrañaga klubeko ordezkarien eskutik jaso zuen saria Arrietak.
Zubiaurre klubak adierazi du zozketaren helburua "herriko dendariei laguntzea" dela. "Zubiaurre igeriketa klubak herriko familiengandik eta bidelagunengandik jasotako laguntza eskertu nahi du, eta, aldi berean, bere ekarpena egin nahi die Herrixeneko dendariei eta ostalariei. Leloa argia da: 'herriak emandakoa, herriari bueltan eman'", azaldu dute igeriketa klubeko ordezkariek.