San Andres eguna da gaur, azaroak 30. Ordea, jaien bueltako hirugarren asteburuan murgilduta daude Azkoitian eta atzo, zapatua, musika doinuekin borobildu zuten han egun handiaren bezpera.
18:00etatik 22:00etara bitartean, Munizzio eta Garai disko jartzaileak arduratu ziren Berdura Plaza girotzean. Hozl Und Blech musika elektronikoaren jaialdiaren sustatzaileek antolatuta, gazte jende ugari bildu zen han musika elektronikoaz gozatzeko. Kalean, berriz, Joselontxos txarangako kideak ibili ziren, gora eta behera. Donostiako musikariek egungo eta ohiko abestiak eskaini zituzten, herritarrei jai giroa piztuz.
Gaur, San Andres eguneko ohiko egitaraua izango da herrian. Aurten ere plaza izango da herritarren festarako bilgune nagusia, hango arkupeetan jarriko dituzte-eta jan-edanerako postuak hainbat eragilek. Horrez gain, dultzaineroen, trikitilarien eta txistularien kalejirak, marrazki lehiaketa, herri kirol jaialdia, Kontzejupeko pilota txapelketako finalak eta Joxe Mendizabalen erromeria izango dira goizetik iluntzera bitartean.
Hona hemen gaurko egitaraua:
- 09:30. Herriko dultzaineroen eta trikitilarien kalejira.
- 10:00. Marrazki lehiaketa, Txuri Urdin elkarteak antolatuta.
- 11:00. Herriko trikitilarien kalejira.
- 11:30. Txalkor txistulari taldearen kalejira, Mendaroko eta Azpeitiko txistulariekin.
- 12:30. Herri kirol jaialdia, plazan.
- 14:00. Marrazki lehiaketako sari banaketa, plazan.
- 16:00. 51. Kontzejupe Sariaren azken partidak Kontzejupean, Oteiza pilota elkarteak antolatuta.
- 20:00. Joxe Mendizabalekin erromeria, plazan.