Urteurren biribila zuen gaur Anaitasuna-Kakute xake taldearen San Andres Xake Txapelketak, eta inoiz baino biribilago joan da. Enrique Tejedor nazioarteko maisuak irabazi du gaur, zapatua, 30. aldiz jokatu duten sanandresetako txapelketa.
Zortzi puntu lortu ditu Kantabriako xake jokalariak,, baita Juan David Becerra Fide maisuak ere. Ordea, Tejedorrek berdinketa hausteko puntuazioa hobea zuen Becerraren aldean, eta hori hala, hark hirugarrenez lortu du sanandresetako txapelketa irabaztea. Hirugarren postuan, berriz, azkenaldian sekulako maila erakusten ari den Oier Sarasketa zumaiarra sailkatu da; hark 7,5 puntu bildu ditu. Taldekakoan, bestalde, Gros nagusitu da, eta Anaitasuna-Kakute taldea sailkatu da bigarren.
Errekor guztiak hautsi ditu probak parte hartzeari dagokionez. Guztira, 175 bat xake jokalari bildu dira Elkarguneko Herriko Plaza eta Oteiza aretoetan xake partidak jokatzeko, eta hala, inoizko xake jokalari gehien bildu ditu txapelketak. 43 klub desberdinetako ordezkariak elkartu dira Azkoitian, Euskal Herri mailako klubez gain, baita Espainiakoak ere.
10:00etan, ordurako, ekin diote horiek guztiak lehiari, Ana Azkoitia herriko alkateak ohorezko mugimendua eginda ekin ere. Xake jokalariek suitzar sistemako bederatzi txanda jokatu behar izan dituzte, blitz erritmoko hiru minutu + bi segundo eran. Beste hainbat probatan bezala, Mikel Almansa nazioarteko Fide epailearen aginduetara aritu dira xake jokalariak, eta hari laguntzen jardun dute Ferran, Villanueva, Virto, Plazaola eta Lopovi epaileek. Beste urte batez, giro ederrean igaro dute sanandresetan xakearekin egin ohi duten hitzordua.
(Argazkiak: Andoni Elduaien eta Anaitasuna-Kakute)