Euskal Herriko hainbat txokotako dultzaineroen topalekua izan da gaur, zapatua, Azkoitia. Herriko Txalkor txistulari taldeak antolatu du gaurko topaketa, eta hainbat izan dira deialdiari erantzun diotenak. Besteak beste, Debako, Hernaniko, Tolosako (Gipuzkoa), Garesko (Nafarroa) eta Azkoitiko 40 bat dultzainero elkartu ditu hitzorduak. Zahar, gazte zein heldu, guztiek batera giro ederra sortu dute sanandresetako egun handiaren atarian.
Berdura Plazan, Aita Madinabeitia plazan, herriko plazan, eliz atarian... Hainbat gunetan jo dituzte dultzaineroek piezak. Gainera, Martirietako Montte baserriko dultzaina jotzaileen zenbait pieza ere jo dituzte. San Andres egunaren atariko hitzorduan, plazarik plaza eta kalerik kale musikariak.