Metroterdi taldeak irabazi du Maxixatzen Euskaldunon Elkarteak antolatutako 2025eko Orbel Jokoak lehiaketa. Atzo, ostirala, Elkarguneko Intsausti aretoan jokatu zuten finala, eta txapeldunek Oro ez da urre eta Elkue hartu zituzten mendean. Guztira, bost proba jokatu zituzten finalistek, eta estu joan zen dema. Maite Azpirozek, Jon Albizurik eta Uxoa Izagirrek osatutako Metroterdi taldeak 112 puntu batu zituzten, 105 puntu lortu zituen Igor Juaristik, Iosu Plazaolak eta Arkaitz Arakistainek osatutako Oro ez da urre taldeak, eta 89 puntu, Esther Suduperen, Mireia Suduperen eta Aritz Albizuriren Elkue taldeak.
Lehen proban, lehiakideek esaera zaharrak osatu behar izan zituzten. Oro ez da urre eta Metroterdi taldeek asmatu zituzten gehien, hasieratik Elkue atzean utziz; hamabina puntu batu zituzten haiek, eta hiru puntu Elkuek. Bigarren proban, herriko hainbat ateren kokapena asmatu behar izan zuten lehiakideek, eta Oro ez da urrek eta Elkue aritu ziren ondoen bigarren jolasean, horiek 25na puntu batu zituzten eta; Metroterdik hogei pilatu zituen. Hirutik bat izeneko hirugarren proban, hitzen definizioa jarrita, azalpen hura zein hitzi zegokion asmatu behar izan zuten hiru taldeek. Metroterdi nagusitu zen orduan 38 puntu batuta, eta 30na lortu zituzten beste biek.
Gauzak estu zeuden markagailuan, eta bi proba jokatzeko; laugarren jolasak garrantzia handia hartu zuen hala. Herri bateko argazkia eta haren gaineko bi azalpen emanda, herria asmatu behar izan zuten partaideek. Hain justu, proba horretan lortu zuen Metroterdik hirugarren proban hartutako zuen abantaila handitzea, 24 puntu eskuratu zituen-eta taldeak; Oro ez da urre taldeak lau puntu gutxiago batu zituen, eta hamasei, Elkuek. Garaipena bideratuta, Metroterdi taldeak nahikoa zuen azken proban Oro ez da urre taldeak beste puntu batzea, eta halaxe gertatu zen. Partaideek nahastutako bi abestiak edo horien egileak asmatu behar izan zituzten; Metroterdik zein Oro ez da urrek hemezortzina puntu lortu zituzten, eta hamabost pilatu zituen, bere aldetik, Elkuek.
Hona hemen 2025eko Orbel Jokoen puntuazioa eta sailkapena:
- Metroterdi taldea, 112 punturekin.
- Oro ez da urre taldea, 105 punturekin.
- Elkue taldea, 89 punturekin.
(Argazkiak: Maxixatzen elkartea eta Oier Arregi)