Azkoitiko Plaza Ondo jubilatuen eta pentsiodunen elkarteak giro ezin hobean ospatu dute aurtengo urteko Jubilatuen Astea. Astelehenean ekin zioten asteari, bi hitzaldi entzunda: goizean, Miguel Angel Vazquez erlaxazio eta meditazio tekniketan aditua denak eskaini zuen hitzaldia, eta arratsaldean, Gurutze Gorriko ordezkariak aritu ziren nahigabeko bakardadeari buruz.
Asteartean, goizean, Juan Bautista Mendizabal Azkoitiko kronista ofizialak zuzendutako bisita gidatua egin zuten hainbat lagunek. Herriko hainbat kontu, historia eta txoko ezagutzeko aukera izan zuten orduan herritarrek; besteak beste, Intsausti jauregia bisitatzeko aukera izan zuten parte hartzaileek. Arratsaldean, berriz, tute, eskoba eta seiko urrea txapelketen aurre kanporaketak jokatu zituzten elkartean; izan ere, asteazkenean jokatu zituzten karta joko horien finalerdiak eta finalak. Plaza Ondok hainbat lagun saritu zituen orduan. Ostegunean, bestalde, bingo berezia egin zuten elkartean, eta orduan ere poltsikoak betetzeko aukera izan zuten erretiratuek. Atzo, ostirala, txokolate jana eginda amaitu zituzten asteguneko hitzorduak.
Bihar, San Andres eguna, pintxoa eta ardoa eskainiko ditu elkarteak bazkideentzat, eliz atariko Hika tabernan. 11:00etatik 13:00etara bitartean, doan eskainiko du jubilatuen elkarteak mokadua, baina elkarteko arduradunek Plaza Ondoko bazkide txartela eskatuko diete bazkideei.
Bazkaria, abenduaren 7an
Abenduaren 7an, igandez, lagunarteko bazkaria eginda amaituko du Plaza Ondok Jubilatuen Astea. Aurrena, 11:00etan, meza nagusia egingo dute, Andre Mariaren Jasokundeko parrokian. 14:00etan, berriz, bazkaria egingo dute.
Otordu horretarako izen ematea datorren asteartean, abenduaren 2an itxiko du Plaza Ondok. Jubilatuen elkarteko bazkideek 45 euro ordaindu beharko dute bazkarirako izen ematea, eta bazkide ez direnek, 50 euro.