Azkoitiko Sare Herritarrak deituta, atzo, ostirala, egin zuten presoen, iheslarien eta deportatuen eskubideen aldeko hil honetako azken ostiraleko elkarretaratzea. Dozenaka lagun elkartu zen herriko plazan, eta haiek nabarmendu zuten aurtengoa "urte oparoa" izan dela. "Etxeratze prozesua nahi genukeena baino mantsoago garatzen ari bada ere, aurrera egindako urratsak nabarmenak izan dira, eta euskal preso, iheslari eta deportatu guztiak etxeratzearen helburua inoiz baino gertuago dugula baiezta dezakegu", esan zuten.
Aurrera egindako urrats horien arrakasta, "hein handi batean, euskal gizartearena" dela adierazi zuten. "Auzoz-auzo eta herriz-herri urte osoan zehar egindako mobilizazioen ondorio dira urrats horiek". Puzzlea osatu arte dinamikarekin hasi zuten aurtengo urtea, eta udan zehar hondartzetako, herrietako nahiz hirietako mobilizazioekin jarraitu gero. Urriaren 18an egin zuten konferentzia, berriz, gizarteak "ondorioei behin betiko konponbidea emateko duen beharraren isla argia" izan zela nabarmendu zuten.
Hurrengo mobilizazioak
Kontzentrazioaren amaieran, gainera, Sare Herritarrak egingo dituzten hurrengo mobilizazioen berri eman zuten. Batetik, abenduaren 31n, Gabon zahar egunean, herriko kaleetan zehar manifestazioa egingo dute; ohi bezala, 18:30ean herriko plazan hasita egingo dute protesta. Bestetik, urtarrilaren 10ean, larunbatez, Sare Herritarrak Bilboko kaleetan egingo duen manifestaziorako deia zabaldu zuten Azkoitiko ordezkariek.
Mobilizazio horiek guztiak Ezin da gehiago luzatu lelopean egingo ditu Sare Herritarrak, "urteetako gatazkak utzitako ondorioen konponbideak ezin duela gehiago luzatu" aldarrikatzeko. "Sufrimenduak ezin duela gehiago luzatu aldarrikatuko dugu; egiak, aitortzak eta erreparazioak ezin duela gehiago luzatu aldarrikatuko dugu; eta noski, konponbideak, bakeak eta elkarbizitzak ezin dutela gehiago luzatu aldarrikatuko dugu", esan zuten.
Azaldu zuten euskal herriaren zati handiena "ondorioak atzean uzteko eta etorkizunari begira jartzeko prest" dagoela. "Prest izatea baino, behar bat da gizartearentzat, iraganera iltzatzen gaituenarekin apurtu eta aurrera egiteko. Argi erakutsiko dugu, beste behin, biolentzia ezberdinen biktimen aitortzarekin eta euskal presoen, iheslarien eta deportatuen etxeratze prozesuarekin eskuratuko ditugula elkarbizitzarako agertokiak".