2026ko Euskal Herriaren Itzuliaren seigarren eta azken etapan birritan igaroko dira txirrindulariak Azkoititik. Hain zuzen, bi aldiz igo eta jaitsi beharko dituzte Gorla eta Azkarate mendateak kirolari profesionalek. Antolakuntzak atzo, asteartea, eman zuen hurrengo urteko probaren azken etaparen berri Bergaran (Gipuzkoa) egindako aurkezpenan.
Antzuolan (Gipuzkoa) hasi eta Bergaran (Gipuzkoa) amaituko da 133,7 kilometro izango dituen azken etapa. Guztira, 3.000 metroko malda positiboari aurre egin beharko diote txirrindulariek 2026ko apirilaren 11n, larunbatez, jokatuko den proban.
Zirkuitu itxurako ibilbidea egin beharko dute txirrindulariek probaren azken egunean; izan ere, sei mendate igo beharko dituzte kirolariek. Hurrenez hurren, honako hauek dira aurre egin beharreko gainak: Asentzio (3. maila), Gorla (2. maila), Azkarate (3. maila), Gorla (2. maila), Azkarate (3. maila), Asentzio (2. maila). Lasterketa Bergarako Matxiategi kalean amaituko da.
Hona hemen etaparen profila:
