Azkoitiko Udalak gaur, asteazkena, iragarri ditu San Andres jaiei begira motorrak berotzen hasteko kontzertuak zein musika taldek emango dituzten. Añube eta Trini Fox taldeak igoko dira herriko plazako agertokira azaroaren 15ean, larunbatez, 22:30ean. Udalak eta Um Blem Ble tabernarien elkarteak antolatu dute musika gaua elkarlanean.
Duela bost urte hasi zuen bere ibilbidea Añube musika taldeak. Aitor Bedia Hans abeslaria buruz, Arrasateko, Bergarako, Aretxabaletako eta Ataungo (Gipuzkoa) musikariek osatzen dute rock talde hori, eta dagoeneko bi disko kaleratu dituzte. 2022an argitaratu zuten lehena, musika taldeari izena eman zion Añube izenekoa. Iaz, berriz, Errautsetatik loratzen izenekoa kaleratu zuten. Euskaraz eta gazteleraz abesten dute taldekideek.
Añuberen ondoren, etxeko musika talde bat igoko da oholtzara: Urrestilla auzoan sortutako Trini Fox punk rock taldea. Azkoitiko eta Azpeitiko kideek osatzen dute musika talde hori, eta haiek iaz kaleratu zuten Flanagan EPan bildutako doinuak aurkeztuko dituzte herrian. Azken proiektu horren aurretik kaleratutako Letaginak eta Ataraxia lan luzeetako zenbait abesti ere joko dituzte, ordea.