Egunean zehar hainbat lantokitan lanuzteak egin ondoren, Azkoitiko plazan elkartu dira 300 bat herritar iluntzean, Gernika-Palestina herri ekimenaren deialdiari erantzunez, Palestinaren alde eta Israelen kontrako boikota eskatzeko.
Gutxitan bezala bete da herriko plaza elkarretaratze batean. 19:30erako zegoen deituta bilkura, baina 19:00 alderako plaza erdian elkartu dira Palestinako lehen banderak. 19:30ean puntuan hasita, ordurako jende ugari hasierako banderen bueltan elkartuta zela, eltzeak astinduz eta txistua joz, ordu laurdenez etengabekoa izan da burrunba plazan; soinua ateratzeko trasteak herritar gutxiren eskutan egon badira ere, nahikoak izan dira zarata sortzeko.
Amaieran, eskerrak eta zorionak eman dizkiete deitzaileen izenean gaurko egunean zehar eta aurrekoetan Palestinaren alde mobiliatu diren herritar guztiei, baina, bereziki, Palestinaren alde eta Israelen kontra mobilizatzen jarraitzeko premia azpimarratu dute, sinatu berri duten bake akordioaren edukiagatik, eta Israelek palestinarrak hiltzen jarraitzen duelako, besteak beste.