Anaitasuna mendi bazkunak Nafarroara egin du Gure Gure Txokoak Ezagutzen egitasmoaren barruko azken irteera. Joan den zapatuan, 25 bat lagunek zeharkatu zituzten Auritz, Sorogain eta Urkiaga Gaina. Guztira, 18 kilometroko ibilbidea osatu zuten, eta eguraldia lagun, egunpasa ederra egin zuten.
Ordea, ez da Anaitasunak hil honetarako antolatuta duen ekintza bakarra. Datorren zapatuan, hilak 18, espeleologia irteera egingo du mendi bazkunak. Lekeitio eta Berriatua (Bizkaia) herrien artean dagoen Milloi mendatearen azpiko Laminetako koba bisitatuko dute. 08:30ean abiatuko dira Aizkibel liburutegiaren alboko geralekutik, eta irteera amaitu bezain pronto itzuliko dira Azkoitira; asmoa da koba lau edo bost orduan zeharkatzea. Mendi taldeak jakinarazi duenez, dagoeneko beteta daude irteera horretarako plaza guztiak.
(Argazkiak: Anaitasuna mendi bazkuna)