Felix Illarramendi Errota trikitilariaren aldeko hileta elizkizuna izan zen atzo —ostiralean hil zen— Azkoitiko Andre Mariaren Jasokundeko parrokian, eta dozenaka lagunek trikiti doinuz agurtu zuten musikaria. Izan ere, hango eta hemengo trikitilari ugari elkartu ziren elizaren kanpoaldean Errotari hainbat pieza eskaintzeko.
Jaiotzez Aizarnako Errotabarrena baserrikoa zen Illarramendi, baina Azkoitian bizi zen. Gaztetan hasi zen hura trikitia jotzen, eta bere kasa ikasi zuen musika tresna hori, inguruko beste hainbat trikitilariri begira, hala nola Auntxa, Maltzeta, Tapia eta Elgetari. Ikasi bakarrik ez, musika tresna berezi bat ere sortu zuen Errotak duela urte batzuk: Jazzbana edo bateria txiki moduko bat; "Errota instrumentua" deitzen zion berak.
70eko hamarkadan, bestalde, bitan parte hartu zuen Euskal Herriko Trikiti Txapelketan, eta Urola Erdiko txokoak girotzen ere aritu izan zen hainbatetan. 2009an, berriz, Imanol Iturbiderekin batera omenaldia jaso zuen Martirietan.