Etzi, astelehena, egingo dituzte udako oporraldiaren osteko aurreneko odol ateraldiak, Elkarguneko Herriko Plaza aretoan. Osakidetzako erizainek arratsaldez egingo dituzte ateraldiak datorren hileko lehen hitzorduan, 16:30etik 20:30era bitartean, hain zuzen.
Azkoitiko Odol Emaileen Elkarteko ordezkariak hasita daude herritarrei astelehenerako hitzorduak ematen. Dena den, odola inoiz eman ez dutenek ere badute odola ematen hasteko aukera. Emaile izan nahi dutenek edo odol ateraldien funtzionamendua zein den hobeto ezagutu nahi dutenek 610 11 21 45 telefono zenbakira deitu behar dute.
Abuztuaren 11ko ateraldian 84 odol poltsa bildu zituzten. Etzikoaren ondoren, irailaren 22an izango dute odol emaileek hurrengo hitzordua, eta orduan goizez nahiz arratsaldez arituko dira Odol Emaileen Elkarteko kideak herritarren odola biltzen. 09:30etik 13:30era eta 16:30etik 20:30era emango dizkiete herritarrei hitzorduak.