Aiako festen azken hondarretan, gizonezko aizkolarien binakako eta emakumezko harri jasotzaileen banakako finalak ikusteko aukera egongo da pilotalekuan. Izan ere, igandean, abuztuaren 10ean, Gipuzkoako txapelketak izango dira han, 17:30etik aurrera.
Lehenengo mailako binakako aizkora lehian gizonezkoak jardungo dira, guztira sei partaide, hiru bikote osatuta: Julen Alberdi Txikia IV.a azkoitiarra eta Jokin Urretabizkaia Basozabal; Mikel Larrañaga azpeitiarra eta Ugaitz Mugerza; eta, Eneko Otaño beizamarra eta Xabier Zaldua. Horiek nor baino nor ariko dira txapela eskuratzeko lehian.
Harri jasotzen, berriz, emakumezkoak arituko dira, Lau Arroa torneoko txapela jokoan egonik. Lau harri jasotzailek parte hartuko dute lehian: Olaia Esnaola azpeitiarrak, Goizeder Abendibarrek, Lierni Osa zarauztarrak eta Ane Cestauek.