Azkoitian kokatuta dagoen eta makina erremintaren sektorean aritzen den Juaristi enpresako lan gatazkari lotuta, lantegi horren nagusi Carlos Juaristi interpelatzen duten hainbat pankarta agertu ziren atzo Azpeitian.
Horren aurrean, norbanakoen ohore eskubidea defendatu du Azpeitiko EAJk sare sozialen bidez, adierazpen askatasuna aldarrikatzen duela baina "horrelako eraso pertsonalak" ez zaizkiola "onargarriak" iruditzen adierazita. Halaber, Nagore Alkorta Azpeitiko alkateari pankartak erretiratzeko eskatu dio EAJk, eta esan du gatazkak konpontzeko "zenbait muga" ezin direla gainditu.
Hilabeteak dira Azkoitiko Juaristi enpresan lan gatazkak eztanda egin zuela, eta maiatzaren 6az geroztik aldi baterako lan erregulazio espedientea indarrean dute lantegian. Printzipioz, sei hilabetez izango da neurri hori indarrean, hau da, azarora arte. Neurri horren ondorioz, %30eko lanaldia ari dira egiten beharginak.