Bihar, osteguna, egingo dute Baztartxo antzokian Gu ere bertsotan egitasmoaren ikasturte amaierako bertso saioa.
Amaitzear den ikasturtean ere Azkoitiko Xabier Munibe, Floreaga eta Bizilore ikastetxeetako dozenaka ikasleek landu dute bertsolaritza Bertsozale elkarteren eskutik, Irati Artetxe azkoitiarrak gidatutako saioetan. LHko hirugarren zikloko ikasleak dira –LH 5. eta 6. mailetakoak–, hain zuzen ere, egitasmoan parte hartzen dutenak.
Bihar goizean, 11:00etan, Baztartxo beteko dute ikasle horiek, bertsoak entzuteko, baina bereziki, gai jartzaile lanak egiteko. Txandaka, ikasle taldeak oholtzara igoko dira, han zain izango dituzten Eneritz Artetxe eta Eneko Beretxinaga bertsolariei kanturako gaiak eta ariketak proposatzeko. Pandemiaren aurretik ikasleak beraiek aritzen ziren kantuan Gu ere bertsotan-en ikasturte amaierako jaialdian, baina duela hiru urte molde berri horrekin hasi ziren egiten.