Etzi, zapatua, zuzeneko emanaldiak izango dira Azkoitiko Matadeixen. 19.00etan hasiko dira kontzertuak, eta inprobisazio munduan nabarmentzen diren artistak izango dira protagonista: Duot taldea eta Mixel Etxekopar.
Iberiar penintsulako egungo free jazz eta musika inprobisatuaren talde nagusietako bat da Duot taldea, Albert Cirera saxofoi jotzaileak eta Ramon Prats bateria jotzaileak osatua. Free jazzaren eta musika inprobisatuaren artean mugitzen den proposamen batekin, taldeak bere soinuaren mugak bilatzen jarraitzen du, abangoardiako eszena berriaren liderretako bat bilakatuz. Argitaratu berri duten Haiku azken lana aurkeztuko du bikoteak Matadeixen.
Mixel Etxekopar (Gotaine-lrabarne, Zuberoa, 1963), bestalde, txirula jotzailea, multi-instrumentista, kantaria eta inprobisatzailea da. Zuberoako Mendialdeko Txorien Goi Mailako Kontserbatorioko ikasle ohia da Etxekopar, eta bere jarduna estuki lotuta daga euskal kulturarekin eta euskararekin. Musika tradizionaletik hasi eta inprobisazio zein musika barrokoetaraino ailegatzen diren proiektu diskografikoak argitaratu ditu hark bere ibilbidean, eta errepertorio horretako zenbait eskainiko ditu Azkoitian.
Matadero Ekintzak taldeak jakinarazi duenez, eguraldiak laguntzen badu Matadeixe kanporan izango dira kontzertuak. Emanaldiak ikusteko sarrerak 8 euro balio du.