Xabier Munibe Ikastolak antolatuta, 41. Xabier Munibe Parte Hartze Herrikoia egin dute gaur, igandea, Azkoitian. Guztira, Azkoiti-Azpeitiko 700 bat neska-mutilek parte hartu dute proba inklusiboan, eta bizi ibili dira kalean gora eta behera lasterka. Plazaberrin izan dute helmuga lasterketa guztiek, baina, gaurko irabazle nagusia kirolaren eta festaren uztarketa izan da.
Herriko kaleak bizitzaz eta kolorez bete dira goizean; izan ere, HH4. mailatik DBH2. mailara arte, bederatzi lasterketa jokatu dituzte; denak ere korrikaldi betean ibili dira. Adin tarte horretatik gora, Marea Urdinako zenbait lagunek ere parte hartu dute beste urte batez.
Parte-hartzea eta elkarrekin gozatzea ardatz hartuta, lasterketa politak osatu dituzte guztiek. Giro ona lagun, gainera, jendetza batu da bide bazterretan, eta horien guztien txaloek eta animoek lagunduta, errazago egin dute txikienek helmugarako bidea.