Datorren zapatuan, ekainak 7, Euskal Herri libre baten aldeko aldarria zabalduko du Gure Eskuk Bilbon. Herri Libre Bat. Euskal Herriak erabaki lelopean, askotariko ekintzak egingo dituzte han, egun osoko egitaraua prestatu baitute ordurako. Bilbon zehar hainbat gune egokituko ditu Gure Eskuk, besteak beste, ipuin kontalarien, pailazoen, bertsolarien, kirolarien eta musikarien ikuskizunak izango dira-eta egun guztian zehar.
17:30ean, baina, mobilizazio nazionala egingo dute La Casillatik abiatuta, eta han parte hartu nahi dutenentzat autobusa antolatu du eskualdeko Gure Eskuk. 16:00etan egingo du autobusak geldialdia Azkoitiko Julio Urkixo etorbideko geralekuan, eta bidaia autobus horretan egin nahi dutenek, Kale Nagusiko Lujan saltokian eman beharko dute izena.