Azoitiko gomazko palistek atzo ekin zioten aurtengo Gipuzkoako Herriarteko Txapelketari. Final zortzirenetako joaneko partidak etxean, Gurea pilotalekuan, jokatu zituzten Zumarragaren kontra, eta kanporaketa datorren astean erabakiko den arren, esan liteke ondo bideratuta utzi dutela azkoitiarrek. Izan ere, hiru partidatatik bi irabazi zituzten atzokoan.
Iker Epeldek 20-5 irabazi zuen banakako lehia; Aitor Juaristik eta Igor Larrañagak 11-20 galdu zuten binakakoa; eta Jokin Aizpuruk 20-7 irabazi zuen zazpi koadroren barruan jokatutako buruz burukoa.
Azkoitiak final laurdenetara sailkatzea lortzen badu, Astigarraga izango du aurkari. Finalerako bidean, Azkoitia dagoen adar berean daude, Zumarraga eta Astigarragaz gain, Lasarte-Oria, Hernani eta Aia. Gomazko paletako finala ekainaren 29an, igandez, jokatuko dute, oraindik erabaki gabe duten pilotalekuan.