Oteiza pilota elkarteak atzo eman zion hasiera 53. Azkoitiko Txikito Pilota Txapelketari Gurea pilotalekuan. Aurten, 78 pilotarik parte hartuko dute txapelketan, eta ondorengo sei mailatan jokatuko da: aurrebenjaminak, benjaminak B, benjaminak A, alebinak B, alebinak A eta infantilak. Astez aste jokatuko dituzte partidak pilotariek, eta finalera sailkatzen direnek ekainean izango dituzte azken norgehiagokak.
Atzo, benjaminak B mailakoen partidekin hasi zen txapelketa, eta binakako lau partida ikusteko aukera izan zuten frontoian elkartu zirenek. Honako hauen partidak izan ziren atzo: Julen Barrena-Eki Oria bikotea Aner Korta-Eneko Azkoitiaren aurka aritu ziren; Beñat Moreno eta XabierZabaleta, berriz, Julen Uriarte eta Nahia Astigarragaren aurka; Markel Martin-Xanet Uranga bikotea, berriz, Dei Otaño eta Aner Gonzalezen aurka aritu zen; eta Jakes Juaristi eta Jon Arozena, Amets Etxaniz eta Oihan Leteren kontra.
Gaur ere jokatuko dituzte txapelketako norgehiagokak, eta infantilen txanda izango da 17:00etan. Bihar, berriz, benjaminak A eta alebinak A taldeak hasiko dira lehian, 17:15ean.