Nire samurai txikia dokumentala emango du Berdintasun Sailak datorren astelehenean Elkargunean (18:00), eta ondoren, Naizen adingabe transexualen familien elkarteak solasaldia eskainiko du.
Arantxa Ibarrak zuzendutako ikus-entzunezkoak Ekai Lersundi gazte transexualaren bizitza du oinarri. 2018an, hormona tratamendua lortzeko borrokan, bere buruaz beste egin zuen hark, eta haren guraso Elaxar Lersundi eta Ana Martinezen testigantzekin osatu du Ibarrak hogei minutu inguruko dokumentala. Naizen elkarteko zein gaztearen jaioterri Ondarroako hainbat bizilagunen hitzak ere jaso ditu hark.
Udalaren esanetan, dokumentalaren helburu nagusia da egoera berean dauden haur eta gazteei laguntzea, ez dadin errepikatu Lersundik jasan zuena eta inork ez ditzan zalantzan jarri "errealitate ez-bitarrak".