Azkoitiko Udalak bilera irekia deitu du datorren astearterako, maiatzak 6, andremarietako film laburren lehiaketari buruzko zenbait azalpen emateko. Udaletxeko laugarren solairuko gelan egingo dute bilera 19:00etan hasita, eta aurreko urteetako parte hartzaileek zein partaide berriek parte hartu ahal izango dute bertan.
Besteak beste, aurtengo film laburren lehiaketarako gaia adostea, beste hainbat arloz hitz egitea eta lanak aurkezteko epeak zehaztea izango dute helburu bilkuran. Udalak azaldu duenez, bileraren helburua da "ahalik eta erantzunik zabalena" ematea.
Film laburren lehiaketa andremarietako hitzordurik "jendetsuena eta kuttunena" dela adierazi du erakundeak. "Plaza txiki geratu ohi da herritarrek egindako lanen aurkezpenean. Ikus-entzuleek gozatzeko, ordea, film laburrak egitera animatuko diren talde sortzaileen ekarpena nahitaezkoa da", azaldu du.