Eskuz banakako pilota txapelketako lehen partida jokatu zuten atzo gauean Ezkurdiak eta Larrazabalek Gurea pilotalekuan, eta herritarrek norgehiagoka lehiakorraz gozatu ahal izan zuten.
Binakako txapelketa irabazi berri duen Ezkurdia 10 eta 4 nagusitu zen hasieran, baina Larrazabalek partidari buelta ematea lortu zuen; 14 eta 21. Larrazabalek dena eginda zuela zirudien arren, Ezkurdiak hortzak erakutsi zituen, eta markagailuan parez pare jartzea lortu. Dena den, Larrazabal nagusitu zen; 21 eta 22 bukatu zen norgehiagoka. Emaitza hori tarteko, Ezkurdia txapelketatik kanpo gelditu da.
Ordubetetik gorako partida eskaini zuten bi pilotariek, eta Gurea pilotalekuan elkartu ziren 337 pilotazaleek lehia estua bizitzeko parada izan zuten.