Azkoitiko eta Azpeitiko parrokiek antolatuta, Fernando Prado Donostiako Elizbarrutiko gotzainak hitzaldia eskaini zuen atzo, astelehena, Andre Mariaren Jasokundeko parroki elizan. 19:00etan hasi zen haren saioa; izan ere, 17:00etan, Azpeitiko parrokian eskaini zuen hark Berarengan gure itxaropena izeneko hitzaldia. Jende ugari bildu zen parrokian, eta Prado gotzainak kristauentzat "Jesus itxaropena" dela nabarmendu zuen.
Gaur, asteartea, eta bihar, asteazkena izango dira beste bi hitzaldiak parrokian. Gaur, Mikel Aranguren Donostiako Elizbarrutiko bikario nagusi azpeitiarrak Itxaropenak ez du huts egiten izeneko saioa aurkeztuko du, itxaropena balioan jarriz eta hura "kristauen dohainik handiena" dela azpimarratuz; bihar, Luzia Alberro idazkari nagusiak Itxaropen eraginkorra. Iturriak izeneko hitzaldia zuzenduko du, eta itxaropen eraginkorra izateko iturrien berri emango du.
Eliza Jubileo urtean murgilduta dago aurten, Itxaropenean erromes lelo hartuta. Hain justu, itxaropena oinarri hartuta antolatu dituzte bi parrokiek hiru hitzaldiak. Hitzaldi guztiak Youtubeko bere kanalean eskainiko ditu Azkoitiko Parrokiak; honako honetan jarraitu ahalko da Arangurenena, eta honako honetan Alberrorena.
