Azkarate mendatea zabalik da dagoeneko, beharginek errepidea garbitu ostean. Ordura arte itxita egon da errepidea bi norabideetan, bolada bortitzen ondorioz 06:45ean zuhaitz bat erori delako kuartel zaharraren inguruan; gainera, auto batek eroritako zuhaitza jo du, baina ez da inor zauritu.
Azkoitia eta Urretxu lotzen dituen GI-631 errepidea ere itxita egon da goizaldean, zenbait zuhaitz adar errepide gainera erori eta horiek bidea oztopatzen zutelako. Dena den, orain normaltasuna da nagusi inguru horretan –hirugarren erreia eraikitzeko obrak direla eta, hamar minutuz behin ari dira pasoa ematen ibilgailuei–.
Haizeak, baina, trafikoan bakarrik ez, herrian ere eragin ditu kalteak. Udalak azaldu duenez, Txerloia futbol zelaiaren bueltan izan dira kalte nabarmenenak. Batetik, futbol zelaia inguratzen duen hesia apurtu eta bota du harmailen alboan, eta bestetik, zelaiaren albo bateko zuhaitz bat hautsi du.
