Herritarrek udaletxea barrutik ezagutzeko aukera izango dute datorren zapatuan. Beste zenbait urtetan egin bezala, udalak ate irekien saioa egingo du egun horretan, 12:00etan hasita. Kontzejupean jarri dute hitzordua, eta parte hartu nahi duenak nahikoa izango du udaletxe azpiko frontoira ordurako agertzea.
Bisita Ana Azkoitia alkateak eta Juan Bautista Mendizabal Turismo zein Ondare zinegotziak zuzenduko dute. "Herritarrek zein kanpoko bisitariek eraikina barrutik ezagutzeko eta bertako altxor historikoak ikusteko aukera izango dute. Hainbat bitxikeria ere izango dituzte hizpide, esaterako, nola lehen udaletxean kartzela kokatzen zen, kaperaz, zezendegiaz, alondegiaz eta korrejidorearen bizitokiaz gain", azaldu du udalak.
Bertaratzen direnek, besteak beste, bilkura aretoa edo udalbatza aretoa, alkatetza eta udalaren sail ezberdinak kokatzen diren gainerako gelak bisitatzeko aukera izango dute. Udal artxiboan gordetzen den 1324ko Azkoitiko herriaren sorrerako Hiri Gutuna edota Andre Mariaren Jasokundeko parrokiaren lehen planoa ere erakutsiko dituztela aurreratu du udalak.