Zestoako Wadna elkarteak Sahararen aldeko elikagai eta material bilketa egin du gaur, zapatua, Azkoitiko Eroski supermerkatuan. Tindufeko kanpalekuetan bizi diren milaka errefuxiatuei laguntza eskaintzeko asmoz aritu dira elkarte horretako kideak eta boluntarioak bilketa egiten. Wadna elkarteak arroza, pasta, oliotan bildutako atuna nahiz sardinak, azukrea, konpresak eta lekaleak —babarrunak, dilistak, garbantzuak— eskatu ditu, eta adierazi dutenez, 80 kaxa bete dituzte, guztira.
Herriko kastetxeetan ere egingo dute bilketa astelehenetik aurrera; ostiralera bitartean, Xabier Munibe ikastolan eta Floreaga ikastetxean izango dute herritarrek elkarteak eskatutako produktu horiek guztiak uzteko aukera. Materialak eta elikagaiak eskolen sarreretara bideratzeko eskatu dute, eskolekin koordinazioan.