Anaitasunako gizonen lehen taldeak Deusto Donostia hartu du gaur goizean Txerloia futbol zelaian, Erregional Mailako Ligaren 18. jardunaldia jokatzeko. Gorritxoek partida estua jokatu dute Deustoren aurka, eta markagailuan hiru golen aldea jarri duten arren, donostiarrek neurketa berdintzea lortu dute.
Norgehiagokaren lehen minutuetan, parekotasun handia nabari izan da Txerloian, eta hainbat aukeraren ondoren iritsi da Anaitasunakoen lehenengo gola; 36. minutuan, Pastriren erdiraketa aprobetxatu du Xabik, eta buruz gola sartu du hark. Bi minutu besterik ez dituzte behar izan etxekoak bigarren gola sartzeko, area barruan izandako nahasmen momentu bat aprobetxatuta, Pastrik ez baitu aukera galdu. Hain zuzen, markagailua 2-0 zela iritsi dira atsedenaldira, eta handik bueltan, 47. minutuan, bigarrenez gola sartu du Pastrik. Garaipen argia zirudiena, ordea, beste itxura bat hartzen hasi da 55. minutuan, Deustok lehenengo gola egin duenean. Hamar minutura bigarren gola sartu du Donostiako taldeak, eta partidaren amaieran, 81. minutuan, iritsi da haren hirugarrena. Azkoitiko taldeak ez du aukerarik izan beste golik sartzeko, eta beraz, 3-3 amaitu da norgehiagoka.
Puntu bat eskuratuta, sailkapeneko seigarren postuan da Anaitasuna, eta datorren astean hirugarrenean den Añorgaren aurka jokatuko du partida.
Euskal Ligako emakumeek, bestalde, atzo arratsaldean jokatu zuten ligako 19. jardunaldia Elorrioren aurka, eta Azkoitiko taldeak galdu egin zuen Bizkaiko udalerri horretan jokatutako partida. Norgehiagoka hasi eta zazpi minutura, Elorriok aurreneko gola sartu zuen, eta 21. minutuan, berriz, bigarrena. Anaitasunak ezin izan zuen baloia sarerako lehenengo zatian, baina bigarren zatia hasi orduko Arethak argi izpi bat eman zion taldeari: aurkako taldeko atzelarien huts baten ondorioz, atezaina aurrean geratu baitzen, eta azkoitiarrak ez zuen eskura zuen aukera galdu. Anaitasunako emakumeek gertu izan zuten berdinketa, baina azkenean ez zen posible izan, eta 2-1 amaitu zen haien neurketa.
Horrenbestez, sailkapeneko hamabigarren postuan kokatu da Anaitasuna, 19 punturekin. Datorren astean, berriz, etxean jokatuko dute ligako partida, laugarren postuan den Mariñoren aurka.