Oteizak eta Egañak pilotako Negua txapelketa irabazi dute

Iraia Oteiza 2024ko abe. 31a, 10:15

Negua txapelketako finalean lehiatu ziren lau pilotariak, sariekin. (Oteiza pilota elkartea)

Oteiza elkarteko bi bikotek jokatu zuten asteburuan Negua txapelketako nagusien mailako finala, Gurea pilotalekuan. Jon Oteiza eta Inhar Egaña 22 eta 8 nagusitu zitzaizkien Jon Juaristiri eta Alejandro Juaristiri. Finalaren aurretik, Julen Etxanizek Gipuzkoako eskuz banakako finalerdiko partida jokatu zuen, eta finalerako sailkatzea lortu zuen, Tolosako Artolari 18 eta 15 irabazita.

Oteiza elkarteko pilotariek Negua txapelketako nagusien finala jokatu zuten joan den larunbatean, Gurea pilotalekuan. Jon Oteizak eta Inhar Egañak Jon Juaristiren eta Alejandro Juaristiren aurka neurtu zituzten indarrak herriko frontoian, eta Oteizak eta Egañak osatutako bikotea nagusitu zen, 22 eta 8 emaitzarekin.

Negua txapelketa eskuz binakako lehia berria da, Gipuzkoako txapelketan eskuz binakako jardunaldiak bukatu eta banakakoari ekin aurretik bikotean jokatzen jarraitu nahi duenari zuzendua. Aurreneko edizioan kadete eta nagusi mailetako lehiak jokatu dituzte; hiru bikote aritu dira kadete mailan, eta hamar nagusietan, tartean Oteiza elkarteko pilotariak.

Etxaniz, eskuz banakako finalera

Negua txapelketako nagusien finalaren aurretik, Oteiza elkarteko Julen Etxanizek Gipuzkoako eskuz banakako kadete mailako finalerdia jokatu zuen, Gurea pilotalekuan. Finalerako txartela lortu zuen pilotari azkoitiarrak, Tolosako Artolari 18 eta 15 irabazita. Ostiralean, urtarrilaren 3an, jokatuko du finala Etxanizek, Behar Zana elkarteko Otaegiren aurka. Donostiako Atano III.a pilotalekuan neurtuko dituzte indarrak biek, 19:00etan hasita.

Azkoitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide