Azkoitia 700. urteurreneko ekitaldietan murgilduta egon da 2024. urtean, eta urtemuga berezi horri amaiera emateko, itxiera ekitaldia egingo dute urtarrilaren 4an, larunbatean. Hain zuzen ere, Iosu Arrizabalaga Izer-ek eta Xabier Euzkitzek egindako abestiarekin emango diote amaiera Azkoitia 700eko ospakizunei. Izerrek jarri dio doinua abestiari, eta Euzkitze, berriz, hitzez arduratu da. Larunbateko ekitaldian, 20:00etan, joko dute trikitilariek 700 eta aurrera! izeneko abestia, eta urte guztian udaletxeko fatxadan jarrita izan den irudia itzalduko dute. Aurretik, trikitilariek kalejira egingo dute, 19:00etan abiatuta.
Udalak, herriaren ordezkari gisa, alkate ohiak eta Azkoitia 700 batzordeko kideak gonbidatu ditu udaletxera urteurrenaren amaierako ekitaldira. Erakundeak iragarri duenez, 19:45ean, "ekitaldi xume bat" egingo dute udaletxe barruan, eta jarraian, bertaratutakoak udaletxeko balkoira aterako dira, abesti berria entzun eta fatxadako irudia itzaltzera.
Udalak Izerren eta Euzkitzeren lana eskertu nahi du, "oso detaile polita" delako, Ana Azkoitia alkatearen hitzetan. Halaber, udalak herritarrak gonbidatu ditu plazan elkartzera abestia ezagutzeko eta Azkoitia 700 egitasmoari itxiera emateko.
Hasi bezala, bukatu
2024ko urtarrilaren 4an trikitilariek eman zioten irekiera Azkoitia 700 egitasmoari, eta urtebete geroago, 2025eko urtarrilaren 4an, trikiti eta pandero doinuekin emango diote itxiera. Tarteko hilabeteetan "50 ekintzatik gora" gauzatu dituztela nabarmendu du udalak; tartean izan dira kontzertuak, ikuskizunak eta bestelako ekitaldiak.