Baztartxoko zinema eskaintzaz gainera, bihar, larunbata Demode Quartet laukotearen A kupela kontzertua izango da, 19:00etan, Baztartxo antzokian. Kantua, musika eta umorea uztartzen dituen ikuskizun berria da bihar Azkoitian aurkeztuko dutena. Laukoteak adierazi duenez, "dibertigarria, arina, soinu-kalitate handikoa da, eta orain arte erabili gabeko esperimentu eta ahots-sorpresa batzuk" dituen ikuskizuna da. Sarrerak 10 euro balio du.
Igandean, berriz, Elkarguneko Herri Plaza aretoan Kiki, Koko eta Moko pailazoen Armonia non zaude? izenburuko ikuskizuna izango da haurrentzako, 16:30ean hasita.
Bestalde, igandean, parrokian, 19:00etan, Donosti Ereserki Gregoriar Schola taldearen kontzertua izango da. Gizonek osatutako abesbatza hau 1971n sortu zuten Donostiako San Bizente elizan. Egun abesbatza taldea Euskalerriaren Adiskideen Elkarteko kide da, eta kantu ikerketarako AHisECGre elkarte hispanoaren bazkide fundatzailea da.