Gabonen bueltan, Azkoitiko Udalak askotariko ekintzak antolatu ditu gaztetxoei zuzenduta, eta horien artean horrenbeste interes pizten duen Gabonetako haurren parkea. Gaur irekiko dute Gabon parkea, eta urtero bezala puzgarriak, jolasak eta tailerrak eskainiko dituzte Elkarguneko kantxan.
Haurren Gabon parkea, abenduaren 26tik 28ra bitartean egongo da zabalik, 11:00etatik 13:00etara eta 16:00etatik 20:00etara artean. Bertara joateko txartelak aurrez erostea beharrezkoa zen.
Bestelako jarduerak
Aurten, bi jolas parke eskainiko dizkiete umeei. Elkargunean jartzen dute Gabon parkeaz gain, Mitologia jolas parkea jarriko dute. Abenduaren 30ean egokituko dute Mitologia jolas parkea Elkarguneko Herriko Plaza aretoan. Antolatzaileek azaldu dute hango jokoak publiko guztiei zuzenduta daudela eta bildumaren barruan bi gune bereiziko dituztela. Horien artean, txokoka antolatutako Montessori materiala jarriko dute, 0 eta 3 urte bitarteko umeentzat. 11:00etatik 13:00etara eta 16:30etik 19:30era izango da jolas parkea zabalik, eta doako sarrera izango du.
Hiru eguneko askotariko ikastaroak ere izango dira abenduan zein urtarrilean Elkargunean. Abenduaren 26tik 28ra bitartean, bost tailer eskainiko dituzte: robotika ikastaroa LH4 eta LH 6. mailen arteko ikasleentzat, 10:00etatik 13:00etara artean; arteterapia, LH1 eta LH 3. mailen arteko ikasleentzat, 11:00etatik 13:00etara artean; makrame, LH4 eta LH 6. mailen arteko ikasleentzat, 11:00etatik 13:00etara artean; sukaldaritza gazteleraz, LH4 eta DBH 2. mailen arteko ikasleentzat, 10:00etatik 13:00etara artean; eta Sormen erakusketa bizia, LH4 eta DBH 2. mailen arteko ikasleentzat, 10:00etatik 13:00etara artean. Urtarrilaren 2tik 4ra bitartean, berriz, beste lau ikastaro eskainiko dituzte 10:00etatik 13:00etara artean: robotika, LH1 eta LH 3. mailen arteko ikasleentzat; Eguberri briko proiektua, LH3 eta LH 6. maila arteko ikasleentzat; teknologia ikastaroa, LH4 eta LH 6. maila arteko ikasleentzat; eta Margoz tailerra, LH1 eta LH 3. maila arteko ikasleentzat –11:00etatik 13:00etara artean izango da hori–.
Ikuskizunak, Elkargunean
Hori guztia gutxi ez, eta lau ikuskizun ere eskainiko dituzte Gabonetan, Elkargunean, 16:30ean hasita: abenduaren 29an, Kiki, Koko eta Moko pailazoek Armonia nun zaude ikuskizuna eskainiko dute; urtarrilaren 2an, Patata Tropikala Antzerkia konpainiak Azken eguzkilorea antzezlana eskainiko du; Elvi sabel-hiztunak, berriz, Nere maletatxoak taularatuko du urtarrilaren 3an; eta Ameztuk eta DJ Kaktusek Bihurriak gara eskainiko dute hurrengo egunean.
