Datorren igandean, hilak 15, Gabon Kantak jaialdia eskainiko du Floreaga ikastetxeak, Baztartxo antzokian. Ikastetxeko komunitateak eta hango guraso elkarteak antolatuta, 33. aldiz egingo dute aurten jaialdia. 12:00etan hasita, Gabon jaietan han eta hemen abestu ohi diren kantuak eskainiko dituzte oholtzara igoko diren taldeek.
Ikastetxeko nahiz Gipuzkoako zenbait abesbatza gazte igoko dira abestera antzokiko oholtzara. Hain zuzen, Floreagako haurren taldea, Bergarako musika eskolako abesbatza, Mutrikuko musika eskolako abesbatza eta Floreagako Alai Batza korua igoko dira oholtzara Gabon kantak abestera. Urtero bezala, beraz, herritarrek Gabon jaietan murgiltzeko aukera izango dute.
