Jolas parkeak, ikuskizunak zein ikastaroak izango dira datozen Gabonetarako Azkoitiko Gazteria sailak antolatu duen egitarauaren protagonistak. Izan ere, beste urte batez, ekintza ugari prestatu dituzte haur eta nerabeen oporraldirako, eta gaurtik eman daiteke izena.
Batetik, Negune Bai egitasmoa prestatu du Abarketatxo ludotekak: urtarrilaren 2an, Gabon apaingarriak ikastaroa eskainiko dute, 10:00etatik 12:30era (HH4-HH5) eta 15:30etik 18:00etara, Sortzen ikastaroa (LH1-LH3). Urtarrilaren 3an, berriz, Txef txikiak ikastaroa eskainiko dute, 10:00etatik 12:30era (HH4-HH5) eta 15:30etik 18:00etara, sukaldaritza ikastaroa (LH1-LH3). Azkenik, LH4. mailatik LH 6. mailara artekoak urtarrilaren 4an egun pasa joango dira patinatzera. Ludotekako bazkide direnek gaur eta bihar eman dezakete izena Gazteria Zerbitzuak Elkargunean duen egoitzan, 16:30etik 20:00etara artean, eta gainontzekoek hilaren 9tik 13ra bitartean izango dute horretarako beta.
Abarketatxo ludotekak nola, Artxamendi topalekuak ere antolatu du bere Gabonetako programa, Gazte Astea izenpean: urtarrilaren 2an, areto futbol txapelketa mistoa egingo dute, 10:00etan eta 15:30ean; hurrengo egunean, 10:00etan patata tortilla lehiaketak hartuko du Kontzejupea, eta arratsaldean, 15:30ean, dantza lehiaketa izango da; urtarrilaren 4ean, berriz, mendi irteera egingo dute 10:00etan abiatuta, eta 16:00etan, sari banaketarekin eta meriendarekin borobilduko dute egitasmoa. Ekintza horietan parte hartzeko ere gaurtik hilaren 13ra artean eman daiteke izena.
Bi jolas parke
Aurten, bi jolas parke eskainiko dizkiete umeei: Elkargunean jartzen dute Gabon parkea eta Mitologia jolas parkea. Haurren Gabon parkea, abenduaren 26tik 28ra bitartean egongo da zabalik, 11:00etatik 13:00etara eta 16:00etatik 20:00etara artean. Goizeko txartelak bi eurotan salduko dituzte, arratsaldekoak hiru eurotan, eta hiru eguneko bonuak 12 euro balioko du. Aurrez ere egongo dira sarrerak salgai, abenduaren 16tik 20ra bitartean, Elkarguneko Gazteria Zerbitzu bulegoan.
Abenduaren 30ean, bestalde, Mitologia jolas parkea egokituko dute Elkarguneko Herriko Plaza aretoan. Antolatzaileek azaldu dute hango jokoak publiko guztiei zuzenduta daudela eta bildumaren barruan bi gune bereiziko dituztela. Horien artean, txokoka antolatutako Montessori materiala jarriko dute, 0 eta 3 urte bitarteko umeentzat. 11:00etatik 13:00etara eta 16:30etik 19:30era izango da jolas parkea zabalik, eta doako sarrera izango du.
Hiru eguneko askotariko ikastaroak ere izango dira abenduan zein urtarrilean Elkargunean. Abenduaren 26tik 28ra bitartean, bost tailer eskainiko dituzte: robotika ikastaroa LH4 eta LH 6. mailen arteko ikasleentzat, 10:00etatik 13:00etara artean; arteterapia, LH1 eta LH 3. mailen arteko ikasleentzat, 11:00etatik 13:00etara artean; makrame, LH4 eta LH 6. mailen arteko ikasleentzat, 11:00etatik 13:00etara artean; sukaldaritza gazteleraz, LH4 eta DBH 2. mailen arteko ikasleentzat, 10:00etatik 13:00etara artean; eta Sormen erakusketa bizia, LH4 eta DBH 2. mailen arteko ikasleentzat, 10:00etatik 13:00etara artean. Urtarrilaren 2tik 4ra bitartean, berriz, beste lau ikastaro eskainiko dituzte 10:00etatik 13:00etara artean: robotika, LH1 eta LH 3. mailen arteko ikasleentzat; Eguberri briko proiektua, LH3 eta LH 6. maila arteko ikasleentzat; teknologia ikastaroa, LH4 eta LH 6. maila arteko ikasleentzat; eta Margoz tailerra, LH1 eta LH 3. maila arteko ikasleentzat –11:00etatik 13:00etara artean izango da hori–. Lantegi horiek guztietarako izen-ematea ere zabalik da gaurtik hilaren 15era bitartean. Internetez eman behar da izena, www.elkarguneazkoitia.eus atarian, baina laguntza behar dutenek Gazteria Zerbitzuaren bulegora jo dezakete.
Ikuskizunak, Elkargunean
Hori guztia gutxi ez, eta lau ikuskizun ere eskainiko dituzte Gabonetan, Elkargunean, 16:30ean hasita: abenduaren 29an, Kiki, Koko eta Moko pailazoek Armonia nun zaude ikuskizuna eskainiko dute; urtarrilaren 2an, Patata Tropikala Antzerkia konpainiak Azken eguzkilorea antzezlana eskainiko du; Elvi sabel-hiztunak, berriz, Nere maletatxoak taularatuko du urtarrilaren 3an; eta Ameztuk eta DJ Kaktusek Bihurriak gara eskainiko dute hurrengo egunean.