Aizkibel liburutegian zientzia eta teknologia erronkak egin dituzte aste honetan. LH3 mailatik LH6 mailara arteko hainbat ikasleek parte hartu dute erronka horietan. Hain justu, herenegun, asteazkena, eta atzo, osteguna, egin zituzten saioak haurrek, eta askotariko ekintzak eginda, zientzian nahiz teknologian garatzeko aukera izan zuten.
Nolanahi ere, ez da liburutegiko aste honetako ekintza bakarra; izan ere, Miru ipuin kontalariak Asmatu dezagun amets bat ipuina kontatuko die haurrei gaur, ostirala. 18:00etan hasita, 6 eta 9 urte bitarteko haurrek, LH1etik LH4ra arteko ikasleek, parte hartuko dute Miruren kontakizunean.
Abenduaren 4ko hitzordua
Bestalde, Aizkibel liburutegiak gaur jakinarazi du abenduaren 4an jolasak, kantak, ipuinak eta asmakizunak biltzen dituen Dona, dona katona ikuskizuna eskainiko dutela liburutegian. 17:30ean hasiko da egun horretako saioa, eta 2-5 urte arteko haurrek nahiz horien gurasoek izango dute saioan parte hartzeko aukera.
Dena den, aurrez izena eman beharko da, eta horretarako epea astelehenean, hilak 25, zabalduko dute. Abenduaren 3ra arte eman ahalko da izena liburutegiko harreran bertan edota 943-85 08 98 telefono zenbakira deituta. Liburutegiak jakinarazi du plazak mugatuak direla.