Datorren ostegunetik igandera bitartean egingo dute aurtengo Topagune Sozialista Altsasun (Nafarroa), eta hara joateko autobusak antolatu dituzte Urola Erdian. Zestoan –autobus geltokian–, Azpeitian –anbulatorioaren aurrean– eta Azkoitian –Eroski txikiaren aurrean hartu ahal izango da ostegunean; Zestoan 15:00etan, Azpeitian 15:10ean eta Azkoitian 15:20an. Itzulerako autobusa, berriz, igandean 11:00etan abiatuko da Altsasutik. Joan-etorria autobusez egin nahi dutenek Haginpe tabernan eman beharko dute izena.
Bestalde, Topagune Sozialista egingo den hiru egunetan hara autoz joateko hitzorduak ere jarri dituzte. Horrenbestez, Altsasura autoz joateko asmoa duten herritarrei egun bakoitzean ordu jakin batean Esklabetara agertzeko deia egin diete: ostegunean 17:00etan eta 19:00etan; ostiralean 09:00etan eta 15:00etan; eta zapatuan 09:00etan eta 15:00etan.
Topagunerako sarrerak gks.eus atarian eskura daitezke, bai bonu orokorra, bai egun bakoitzeko bonua. Gazte Koordinadora Sozialistak antolatu du topagunea.