Txerloia tenis klubak Udazkeneko Tenis Txapelketa antolatu du beste urte batez, eta jokalariek hilaren 31ra bitartean eman dezakete izena, 669 62 18 02 telefono zenbakira whatsapp mezua bidalita. Azaroaren 6an hasiko da banakako tenis txapelketa, eta antolatzaileek jakinarazi dute leku mugatua duela izen-emateak, kategoria bakoitzean, gehienez, 16 jokalari lehiatuko baitira.
Hain zuzen, hiru kategoria izango ditu txapelketak: brontzearen kategorian, emakumeek eta gizonek txapelketa bana jokatuko dute; eta zilarraren eta urrearen kategoriak txapelketa mistoak izango dira. Klubak azaldu du jokalari bakoitzak erabakiko duela zein kategoriatan izena eman, antolatzaileen beraien laguntzarekin. Ligaxka erako txapelketa izango da, eta jokalari bakoitzak gutxienez bi partida jokatuko ditu kategoria bakoitzean. Partidak jokatzeko, jokalari bakoitzak Dunlop pilota poto bat jasoko du.
Brontzean parte hartu nahi duenak 15 euro ordaindu beharko ditu, eta urrean edo zilarrean jokatu nahi duenak, 20 euro. Bizum bidez egin beharko da ordainketa, abonatuak eta tenis eskolako kideak izan ezik; haiei kontutik kobratuko diete izen-ematea.