Azkoitiko Udaleko Berdintasun sailak Gurasotasun positiboa ikastaroa antolatu du datozen asteetarako, urtebeteko eta 2 urteko seme-alabak dituzten guraso berriei zuzenduta. Antolatzaileen arabera, seme-alaba izateak berarekin dakartza "poztasunak eta emozioak" zein "kezkak eta zalantzak", eta horiei bide emateko saioak izango dira eskainiko dituztenak; besteak beste, haurraren garapen ebolutiboa, estimulazioa, gurasoaren eta umearen arteko lotura eta guraso izatearen esperientzia landuko dute ikastaroan.
Urriaren 22an eta azaroaren 5ean eta 12an izango dira saioak, 17:00etatik 18:30era bitartean, Elkargunean. Doako ikastaroa da, eta dagoeneko eman daiteke izena udaletxeko Herritarren Arreta Bulegora joanda, berdintasuna@azkoitia.eus helbide elektronikora mezua idatzita edo 943-54 20 14 / 943-08 00 80 telefono zenbakietara hots eginda.